၂၀၂၀ပြည့်နှစ်၊စက်တင်ဘာလ(၃၀)ရက်နှင့်အောက်တိုဘာလ(၁)ရက်ရခိုင်ပြည်တိုက်ပွဲသတင်းများ

blog

Date : 02-Oct-2020

Nyo Twan Awng

မြန်မာ့တပ်မတော်သည် ရခိုင်၊ ပလက်ဝဒေသများ၌စစ်ဆင်ရေး နှင့် ထိုးစစ်များကို ဆက်လက်ပြုလုပ်နေသောကြောင့် ယခုရက်များအတွင်းတိုက်ပွဲများဆက်တိုက်ဖြစ်ပွားခဲ့သည်။

ကိုရိုနာ-ဒုတိယလှိုင်းကာလ၌ပင် စစ်ရာဇဝတ်နယ်ချဲ့ဖက်ဆစ်အကြမ်းဖက်အဖွဲ့(ခ) မြန်မာ့တပ်မတော်သည် တစ်ရွာဝင်တစ်ရွာထွက်ပြီး အပြစ်မဲ့အရပ်သားများအား တရားဥပဒေမဲ့ဖမ်းဆီးခြင်း၊ အရပ်သား၊ လမ်းသွားလမ်းလာများအား ဖမ်းဆီးပြီးသတ်ဖြတ်ခြင်းများကို နေ့တိုင်းနီးပါးပြုလုပ်လျက်ရှိသည်။ အရပ်သားများကိုဦးတည်တိုက်ခိုက်လျက်ရှိသည်။ အခြားတစ်ဖက်တွင် ကိုရိုနာကူးစက်ရောဂါပိုးထိန်းချုပ်ရေး၊ ကြိုတင်ကာကွယ်တားဆီးရေးအတွက် လိုက်နာရမည့်စည်းကမ်းများကို ချိုးဖောက်ပြီး အကာအကွယ်မဲ့ သွားလာနေသောကြောင့် ကိုရိုနာကူးစက်ရောဂါပိုးများကို သယ်ဆောင်ဖြန့်ဖြူးနေခြင်းနှင့်တူသည်။

ဘူးသီးတောင်မြို့နယ်၊ ညောင်ချောင်းရွာအနောက်ဖက် (၁.၅) ကီလိုမီတာအကွာအဝေးရှိ မိမိတို့တပ်ဖွဲ့ဝင်များရှိရာနေရာသို့ မြန်မာ့တပ်မတော်မှ ထိုးစစ်ဆင်တိုက်ခိုက်လာခဲ့သောကြောင့် ၂၀၂၀ ပြည့်နှစ်၊ စက်တင်ဘာလ (၃၀) ရက်နေ့ တွင် မိနစ်အနည်းငယ်ကြာ ထိတွေ့မှုရှိခဲ့သည်။ ရန်သူသည် လက်နက်ကြီးများဖြင့်သာ တောက်လျှောက်ပစ်ခတ်တိုက်ခိုက်နေခဲ့သည်။ ထို့အတူ အောက်တိုဘာလ (၁) ရက် ၊ နံနက် (၇) နာရီခန့်မှစတင်ပြီး ရန်သူသည်ထပ်မံထိုးစစ်ဆင်တိုက်ခိုက်လာခဲ့သည်။ အာရက္ခစစ်သည်တော်များမှ အကောင်းဆုံးခုခံကာကွယ်နိုင်ခဲ့သည်။ ရန်သူမျက်မြင် (၇) ဦးအားသုတ်သင်ရှင်းလင်းနိုင်ခဲ့သည်။

မင်းပြားမြို့နယ်၊ တောင်ပုတ်ကေ(ချင်းကျေးရွာ) အရှေ့မြောက်ဖက် (၁) ကီလိုမီတာအကွာအဝေးရှိ မိမိတို့တပ်ဖွဲ့ဝင်များရှိရာသို့ အင်အား(၂၀၀) ကျော်ပါသော မြန်မာ့တပ်မတော်မှ နေရာ(၃) နေရာမှ တစ်ပြိုင်နက်တည်း ထိုးစစ်ဆင်တိုက်ခိုက်ခဲ့သောကြောင့် အောက်တိုဘာလ (၃၀) ရက်၊ နေ့လယ် (၁) နာရီ(၃၀) မိနစ်မှ ည (၆) နာရီခန့်အထိ တိုက်ပွဲများပြင်းထန်ခဲ့သည်။ မိမိတို့အနေဖြင့် ရန်သူ၏ထိုးစစ်အား အကောင်းဆုံးခုခံတိုက်ခိုက်နိုင်ခဲ့သည်။ အောက်တိုဘာလ (၁) ရက်နေ့တွင်လည်း ရန်သူသည် အဆိုပါယမန်နေ့၌တိုက်ပွဲဖြစ်ပွားခဲ့သောနေရာအား ထပ်မံထိုးစစ်ဆင်တိုက်ခိုက်ခဲ့သောကြောင့် တိုက်ပွဲများဆက်လက်ဖြစ်ပွားခဲ့သည်။ တိုက်ပွဲ (၂) ရက်တာကာလအတွင်း ရန်သူ (၂၀) ကျော်အား သုတ်သင်ရှင်းလင်းနိုင်ခဲ့သည့်အပြင် ဒဏ်ရာရသူ(၁၀) ကျော်အထိရှိခဲ့သည်။

အမ်းမြို့နယ်၊ မြေပုံမြို့နယ်အတွင်း၌ တပ်မ (၆၆) လက်အောက်ခံတပ်ဖွဲ့များ၊ ဘူးသီးတောင်မြို့နယ် အခြေစိုက် ခမရ (၅၅၁) တပ်ရင်း ၊ မင်းပြားမြို့နယ်၊ တိုင်းဗဟို (၉) လေ့ကျင့်ရေးကျောင်း၊ ရသေ့တောင်၊ ရေစိုးချောင်းဗျူဟာ များမှတစ်ဆင့် မြန်မာ့တပ်မတော်သည် လက်နက်ကြီးများကို နေ့တိုင်းပစ်ခတ်တိုက်ခိုက်လျက်ရှိသည်။

မြန်မာ့တပ်မတော်သည် ထိုးစစ်များကို ရခိုင်၊ ပလက်ဝနေရာအနှံ့ပြုလုပ်လာနေသောကြောင့် နောက်နေ့များ၌ တိုက်ပွဲများပိုမိုပြင်းထန်လာဖွယ်ရှိသည်။

သတင်းနှင့်ပြန်ကြားရေး
ရက္ခိုင့်တပ်တော်


Share on social

You may also like this

blog 10-Jul-2021

COVID-19 တတိယလှိုင်းကာလ၌ ကိုရိုနာကူးစက်မြန်ရောဂါအာ . . .