၂၀၂၀ ပြည့်နှစ်၊ သြဂုတ်လ (၂၂) ရက်၊ ရခိုင်ပြည် စစ်ရေး၊ နိုင်ငံရေး၊ COVID-19 နှင့်သက်ဆိုင်သောသတင်းများ

blog

Date : 22-Aug-2020

Nyo Twan Awng

၂၀၂၀ ပြည့်နှစ်၊ သြဂုတ်လ (၂၂) ရက်၊ ရခိုင်ပြည် စစ်ရေး၊ နိုင်ငံရေး၊ COVID-19 နှင့်သက်ဆိုင်သောသတင်းများ

သြဂုတ်(၂၂) @AAInfoDesk2020

၂၀၂၀ ပြည့်နှစ်၊ သြဂုတ်လ၊ တတိယပတ်အတွင်း နှစ်ဖက်ရင်ဆိုင်တိုက်ပွဲများကြီးကြီးမားမားမရှိခဲ့ချေ။ သို့သော်လည်း ရသေ့တောင်မြို့နယ် ကျောက်တန်းရွာပတ်ဝန်းကျင် နှင့် ပလက်ဝမြို့နယ်အတွင်း မြန်မာ့တပ်မတော်၏ ထိုးစစ်ဆင်တိုက်ခိုက်နေမှုများမှာ ဆက်လက်ရှိနေဆဲဖြစ်သည်။ ထို့အပြင် စစ်အင်အား၊ လက်နက်အင်အားဖြည့်တင်းခြင်း၊ စစ်ဆင်ရေးနှင့်ဆက်စပ်သော စစ်ရေးလှုပ်ရှားမှုများကို မြန်မာ့တပ်မတော်သည် ယနေ့အထိ နေ့၊ ညမပြတ် ဆက်လက်လုပ်ဆောင်လျက်ရှိသည်။

ရခိုင်ဒေသအတွင်း၌ ကိုရိုနာကူးစက်မြန်ရောဂါ သည် ဒုတိယလှိုင်း( Second Wave) အနေဖြင့် သြဂုတ်လ(၁၆) ရက်မှ စတင်ဖြစ်ပွားလျက်ရှိသည်။ သြဂုတ်(၁၆) ရက်မှ (၂၂) ရက်(ည ၈ နာရီ) အတွင်း ကိုရိုနာရောဂါကူးစက်ခံရသူ (၆၇) ယောက်အထိ ရှိခဲ့ပြီဖြစ်သည်။ အများစုမှာ စစ်တွေမှ ဖြစ်ပြီး (၆၇) ဦးထဲတွင် မြောက်ဦးမှ (၃) ဦးပါရှိသည်။

Covid-19 ကိုရိုနာဗိုင်းရပ်(စ်) ကူးစက်မြန်ရောဂါသည် မျိုးရိုးဗီဇပုံစံပြောင်းလဲလာခဲ့သည်ဟုယူဆရမည်။ ပုံစံပြောင်းလာသောဗိုင်းရပ်(စ်) ပိုးအသစ်သည် မြန်နှုန်းမြင့်မားစွာဖြင့် စစ်တွေမြို့အတွင်း ကူးစက်ပျံ့နှံ့လျက်ရှိသည်။ (အခြားမြို့အချို့သို့လည်း ပျံ့နှံ့ရောက်ရှိခဲ့ပြီးဖြစ်သည်) ဆက်လက်၍လည်း ယခုထက်ပိုမိုကူးစက်နိုင်မည့်အလားအလာများကို တွေ့မြင်နေရပါသည်။

ထို့ကြောင့် ရခိုင်ပြည်အတွင်းနေထိုင်နေကြသူများအားလုံး Stay At Home မိမိအိမ်တွင်နေထိုင်ပေးကြပါရန် ၊ ကြိုတင်ကာကွယ်တားဆီးရန်ထုတ်ပြန်ထားသော စည်းကမ်းများကိုလိုက်နာကြပါရန် တိုက်တွန်းအပ်ပါသည်။

ဤကဲ့သို့သော ကမ္ဘာ့ကပ်ရောဂါကူးစက်မှုကို ခံစားနေကြရသောအချိန်တွင်လည်း ဆက်သွယ်ရေး အင်တာနက်လိုင်းများကို မဖွင့်ပေးသေးဘဲ ဆက်လက်ပိတ်ဆို့ထားသည်မှာ လူသားမျိုးနွယ်အပေါ် ကြီးမားသောပြစ်မှုကို မြန်မာအစိုးရအနေဖြင့် ကျူးလွန်နေခြင်းပင်ဖြစ်သည်။

သတင်းစီးဆင်းမှုမြန်ဆန်ရန် အရေးတကြီးလိုအပ်နေပြီး သတင်းမှန်များကို အချိန်နှင့်တပြေးညီ ထုတ်ပြန်ရန်၊ ပြည်သူလူထုကိုအသိပေးရန်လိုအပ်သည့် မြန်နှုန်းမြင့် ဆက်သွယ်ရေးအင်တာနက်လိုင်း 4 G ကိုဖွင့်ပေးရမည့်အစား နှေးကွေးပြီး အလုပ်မဖြစ်သော 2 G အဆင့်အင်တာနက်လိုင်းများကိုသာ ဟန်ပြဖွင့်ပေးထားသည်မှာ လူမျိုးရေးအရနှိပ်ကွပ်မှု၊ လူမျိုးဖြုတ်ရှင်းလင်းရေးသို့ဦးတည်သောလုပ်ရပ်များကို မြန်မာအစိုးရ နှင့် မြန်မာ့တပ်မတော်တို့မှ ပူးပေါင်းလုပ်ဆောင်နေခြင်းပင်ဖြစ်သည်။

ULA/AA သည် ကိုရိုနာကူးစက်ရောဂါအား ကြိုတင်ကာကွယ်တားဆီးခြင်းနှင့် ထိန်းချုပ်ရေးလုပ်ငန်းများကို အထောက်အကူပြုစေရန် တစ်ဖက်သတ်အပစ်အခတ်ရပ်စဲခြင်းအား ညီနောင်မဟာမိတ်များနှင့်အတူ အကြိမ်ကြိမ်ကြေညာခဲ့ပြီးဖြစ်သည်။ သို့ရာတွင် မြန်မာ့တပ်မတော်သည် ကိုရိုနာကူးစက်မြန်ရောဂါအား ခုတုံးလုပ်ပြီး စစ်ဆင်ရေးများကို ယနေ့အထိ ဆင်ကန်းတောတိုး ဆက်လက်ပြုလုပ်နေဆဲဖြစ်သည်။ ထို့ပြင် မြန်မာ့တပ်မတော်သည် ၎င်းတို့၏လက်နက်ကြီးစခန်းများနှင့် စစ်သင်္ဘောများပေါ်မှ လက်နက်ကြီးများဖြင့် ပစ်ခတ်တိုက်ခိုက်ခြင်းများကို နေ့တိုင်းပြုလုပ်နေဆဲဖြစ်သည်။

မိမိတို့အနေဖြင့် မိမိတို့ထုတ်ပြန်ထားသည့် ထုတ်ပြန်ချက်များအတိုင်း တိကျစွာလိုက်နာ ဆောင်ရွက်နေသောကြောင့် တိုက်ပွဲများကြီးမားစွာ မဖြစ်ပွားရခြင်းဖြစ်သည်။

မိမိတို့အဖွဲ့အစည်းအနေဖြင့် ကိုရိုနာကူးစက်ရောဂါပြန့်ပွားမှုနှုန်းလျော့နည်းစေရန် အကောင်းဆုံး ပူးပေါင်းဆောင်ရွက်သွားမည်။

သို့သော်လည်း မြန်မာ့တပ်မတော်အနေဖြင့် မိမိတို့အား ဆက်လက်ထိုးစစ်ဆင်တိုက်ခိုက်ခြင်း၊ တိုက်ပွဲဖြစ်ပွားနေသောနေရာများနှင့် စစ်ဆင်ရေးနယ်မြေများအတွင်း စစ်ရေးလှုပ်ရှားမှုများရှိလာပါက မိမိကိုယ်မိမိခုခံကာကွယ်ရုံမှလွဲ၍ လက်ဦးမှုရယူ၍တိုက်ခိုက်သွားလိမ့်မည်မဟုတ်ဆိုသည်ကို ထုတ်ပြန်အပ်ပါသည်။

သတင်းနှင့်ပြန်ကြားရေး
ရက္ခိုင့်တပ်တော်


Share on social

You may also like this

blog 25-Apr-2024

SACနှင့်၎င်းလက်အောက်ခံARSA,ARA,RSOတို့မီးရှို့မှုက . . .