Covid-19 အသက်ယႈလမ်းကြောင်းဆိုင်ရာကိုရိုနာကူးစက်မြန်သီလွယ်တတ်သောရောဂါစွာ လတ်တလောအခြီနီမှာ လူသားမျိုးနွယ်တစ်ရပ်လုံးကို အဓိက ဒုက္ခပီးနီရေ။ အဂုထိဒုက္ခပီးနီတုန်းဖြစ်ပါရေ။

ကျတော်ရို့ ပြည်သူတိကိုလည်း မိမိရို့၏လက်ရှိ ဘဝပီးအခြီအနီအရ Covid-19 ကာကွယ်ဆီးကိုဇာနီရာကပင်ရရ အခွင့်အရီးကိုလက်လွှတ်မခံဘဲ ထိုးနှံဖို့ တိုက်တွန်း အကြံပြုထားပါရေ။ ထိုးကတ်ပါလို့လဲ ထပ်ပနာ တိုက်တွန်းအပ်ပါရေ။

ကိုဗစ်ကာကွယ်ဆီး အပါအဝင် ယင်းရောဂါနန့်ပက်သက်လို့ ကြိုတင်ကာကွယ်တားဆီးရီးဆိုင်ရာ အထောက်အကူပြုပစ္စည်းတိ၊ ကာကွယ်ဆီးတိကိုဇာနားမှာဇာလောက်လိုအပ်လဲလို့ ကျတော်ရို့ဘားက စကစ ဖက်ကမိန်းဖူးရေ ။ မိမိရို့ဖက်ကလည်း သင့်တင်လျောက်ပတ်ပနာပီးနိုင်ရေအဆီ ပီးနိုင်ကြောင်း အကြောင်းပြန်ထားပါရေ။

အေကိစ္စနန့်ပက်သက်လာကေ ကျတော်ရို့ အနီနန့် ကိုယ်ရို့ထက်ပြည်သူတိအတွက်အဓိက ဦးစားပီး စဉ်းစား ပါရေ။

အခြားတဖက်မှာစစ်မှန်သောCovid-19 ကာကွယ်ဆီးကို ထိုးသင့်ရေလူတိ၊ ထိုးကိုထိုးထားရဖို့လူတိအတွက် အခြား ရွီးချယ်စရာနည်းလမ်းတိကိုလည်း ရှာဖွီနီပါရေ။

ကမ႓ာ့ Covid-19 ပေါ်လဆီအရ နိုင်ငံတစ်နိုင်ရှိ ကိုဗစ်ကာကွယ်ဆီးထိုးရဖို့လူဦးရေ၏ အနည်းဆုံး(၅၀) ရာခိုင်နှုန်းထိုးရဖို့ ပေါ်လဆီအရထိုးဖို့စဉ်းစားထားပါရေ။ အကောင်းဆုံးက ထိုးရဖို့လူအားလုံးသူထိုးနိုင်ကေအကောင်းဆုံးပါ။

ဥပမာ- မြို့နယ်တစ်မြို့နယ်မှာ ကိုဗစ်ကာကွယ်ဆီးထိုးရဖို့လူ တစ်သိန်းဟိရေ ယင်းလူဦးရေ၏တစ်ဝက် (၅) သောင်းကို မထိုးမဖြစ်ထိုးရဖို့။ အကောင်းဆုံးကတော့ ထိုးရဖို့လူအားလုံးကိုထိုးနိုင်ကေအကောင်းဆုံးပါ။

ယင်းပိုင်နည်းတူ ကျေးရွာအဆင့်မှာလည်း ယင်းကျေးရွာမှာဟိရေ ကိုဗစ်ကာကွယ်ဆီးထိုးရဖို့လူဦးရေ၏ အနည်းဆုံးတစ်ဝက်ကိုထိုးနိုင်ရဖို့။ ထိုးနိုင်ဖို့အတွက် နိုင်ငံ့အစိုးရတစ်ရပ်၏တာဝန်လည်းဖြစ်တေပိုင် ULA အနီနန့်လည်း ထိုးရဖို့လူတိထိုးနိုင်အောင် ကြိုးစားနီရေအပိုင်းဟိပါရေ။

လောလောဆယ် စဉ်းစားချက်က စကစ ဘားက ရလာဖို့ ကာကွယ်ဆီးတိကို မြို့နယ်(၆) မြို့နယ်ဖြစ်တေ မင်းပြား၊ ကျောက်တော်၊ မြောက်ဦး၊ ဘူးသီးတောင်၊ ရသေ့တောင်၊မောင်တော မြို့ကို ဦးစားပီးအနီနန့်ထိုးလားပါဖို့။ အရီအတွက်ခန့်မှန်း (၄၀၀၀၀) လေးသောင်းဖြစ်ခကေ အေအတိုင်းစဉ်းစားထားပါရေ။ ယင်းထက်များခကေတော့ နောက်တမျိုးထပ်တိုးစဉ်းထားပနာ လုပ်ဆောင်လားပါဖို့။

အရီအတွက်ဇာလောက်ရဖို့လဲ?ထိုးပီးဖို့ ကျန်းမာရီးဝန်ထမ်းတိက ဇာလောက်အထိ လားရောက်ထိုးပီးနိုင်ဖို့လဲ? ဇာအချိန်ထိုးပီးဖို့လဲ ဆိုရေအပေါ်မှာမူတည်ပြီးကေ ကာကွယ်ဆီးတိကို နည်းမှန်လမ်းမှန်နန့်ထိုးလားဖို့ စဉ်းစားထားပါရေ။

စေတနာ နှင့် ရည်ရွယ်ချက်ကို မကွဲပြားနိုင်ရေ အနီအထား မှာ စစ်ရီး၊ လုံခြုံရီးဆိုင်ရာ ကို အလီးအနက်ထားပြီးကေ အခြီအနီကို အကဲဖြတ် သတိထားကာသုံးသပ်ချင့်ချိန်ပြီးကေ ဆက်လက်လုပ်ဆောင်လားပါဖို့။

ရက္ခိုင်အမျိုးသားအဖွဲ့ချုပ်

၂၀၂၁ ခုနှစ်၊ စက်တမ်ဘာလ(၂၁) ရက်၊ အင်္ဂါနိ။