၂၀၂၀ ကို အဝင်မှာတော့ AI လို့ခေါ်ရေ ဉာဏ်ရည်တု( လူလုပ်အသိဉာဏ်) အကြောင်းကိုမသိ၊မကြားဖူးဆိုကေတော့ ကိုယ်စွာခေတ်နောက်ကျရေလူတစ်ယောက်ဖြစ်နီဖို့စွာအမှန်ရာ။ယေဇု AI အကြောင်း၊ AI နန့် ပတ်သက်ရေ ဗဟုသုတစာပီတိကို ရသလောက်လိလာထားကတ်။AI ပညာရှင်တိဖြစ်အောင်ကြိုးစားကတ်-— ညီချေ-ညီမချေရို့။ အောက်သားတိနန့်တိုက်နီရေသမားရိုးကျစစ်ပွဲနန့်အတူ,တပြိုင်နက်တည်းမှာ,နီရာတိုင်း၊ကဏ္ဍတိုင်းမှာတီထွင်တိုးတက်နှုန်းစွာထင်ထားစွာထက်မြန်နီရေ။ AI အကြောင်းမသိ၊မကြားဖူးရေလူစွာခေတ်နောက်ကျနီရေလူ လို့ပြောကတ်ဖို့ဆိုကေ ကိုယ့်ညီ၊ညီမချေတိကိုတော့ ခေတ်နောက်ကျရေလူတိအထဲမှာ မပါချင်စွာကတော့အမှန်ရာ။ မြန်နှုန်းမြင့် AI က, ကမ္ဘာ့လူသားတိကို အိမ်စာပီးထားဗျာယ်။ ရန်သူစွာ အစိုးရစစ်တပ်ဖြစ်ရေအခါ နည်းပညာပိုင်းဆိုင်ရာတိမှာ ကိုယ့်ထက်သုံးနိုင်ရေ။ ယေကေလေ့ ကိုယ်ရို့မှာလေ့ ကိုယ်ရို့အဆံနန့်။ ယေနန့်ဖြစ်လို့အေလောက်ခံချနိုင်စွာ။ ယင်းထက်ပိုသုံးနိုင်အောင်၊ နယ်ချဲ့ရန်သူကိုရခိုင်ပြည်အတွင်းကမောင်းထုတ်နိုင်အောင်တော့ အနည်းဆုံးနောက်ထပ်တစ်ရီ၊နှစ်ရီလောက်ခွပ်ရဖို့သိမ့်။ ယင်းပိုင်ဖြစ်ဖို့က လက်ရှိရခိုင်အမျိုးသားလွတ်မြောက်ရီးတိုက်ပွဲ( ရခိုင်အမျိုးသားလှုပ်ရှားမှုကြီး) မှာပုံစံတစ်မျိုးမျိုးနန့် တိုက်ရိုက်(သွယ်ဝိုက်) ပါဝင်နီကတ်တေလူတိ အမျိုးသားရီးခုခံအားနန့် လက်ဟိန့်ရဟိပြီးသား စည်းလုံးညီညွတ်မှုတိ ၊ပူးပေါင်းဆောင်ရွက်မှုတိ,တစ်ဖဲ့ချေတောင်မလျော့လားဖို့လိုရေ။ တောင့်ထား၊ နယ်ချဲ့သောင်းကျန်းသူအောက်သားတိကိုမောင်းထုတ်ဖို့တာဝန်ကို ရက္ခိုင့်တပ်တော်က အပြည့်အဝတာဝန်ယူရေ။ ရက္ခိုင့်တပ်တော်က,အေပိုင်,မောင်းထုတ်နီရေစပ်ကြားမှာ အမျိုးရို့အားလုံးအနီနန့်,ကိုယ်တာဝန်ယူထားရေအပိုင်းကို မပျက်လားစီကေ့။မလျော့လားစီကေ့။ဆတိုးတာဝန်ယူနိုင်အောင်ကြိုးစားကတ်မေ၊ ဤခရီးကနီးနီရာ။ အမျိုးသားရီးတာဝန်တစ်ခုခုကို အမျိုးသားရီးအသိစိတ်နန့်တာဝန်ယူပြီးသားဖြစ်နီရေ ရခိုင်လူမျိုးတစ်ယောက်အဖြစ်ရှင်သန်ကတ်မေ။ ၂၀၂၀ မရောက်ခင် ခြောက်လအလိုစွာ ဖြူဖို့လား၊မဲဖို့လား၊ ညိုဖို့လား?အားလုံးရင်ခုန်ကတ်မေ။ ဖြူချင်ကေလေ့ ကိုယ်ရို့ရာ။ မဲချင်ကေလေ့ ကိုယ်ရို့အပေါ်မှာရာ။ကံတရားစွာကိုယ့်ဖက်မှာဟိပြီး AI ကိုအသုံးပြုခွင့်ရခကေ,လွတ်မြောက်ရီးတိုက်ပွဲစွာထင်ထားစွာလောက်မကြာလို့ ကျနော်ပြောဝံ့ရေ။ ခေတ်သစ်နည်းပညာနန့်အတူ ခေတ်သစ်စစ်ပွဲ (Modern War) ကို ဆင်နွှဲရဖို့အချိန်စွာမကြာခင်မှာရောက်မှန်းမသိရောက်လာဖို့။ ရန်သူကိုယှဉ်ပြိုင်နိုင်ဖို့အတွက် ကိုယ်စွာရန်သူထက်,နီရာတိုင်းမှာတော်နီဖို့လိုရေ။ မတော်ကေတောင်မညံ့စီရဆိုရေ စိတ်ဓာတ်နန့် တည်တည်ငြိမ်ငြိမ်ထိုးသတ်နိုင်ဖို့လိုရေ။ AI နန့်အတူ 5G Era မှာ ကိုယ်စွာထိုင်နီဖို့၊ အိပ်နီဖို့ ဆိုကေ သူများလူမျိုးတိနောက်မှာကျန်ခလီဖို့ ။ အေခေတ်မှာ နည်းပညာ၊ ဉာဏ်ပညာ၊ အချုပ်အချာအာဏာ၊ ရိုးသားမှု၊ သစ္စာတရားရို့ကို ပေါင်းစပ်ပနာထိထိရောက်ရောက် အလုပ်လုပ်နိုင်ခကေ ရခိုင်တိအားလုံး၏ ရည်မှန်းရာစွာ ပီပီအနီးချေမှာရာ။ဝိုင်းလို့ဆက်ကြိုးစားကတ်ပါမယ်။ ကိုယ့်မှာဟိစွာ၊ ကိုယ်တတ်ထားရေပညာနန့် လာရောက်ဝန်းရံဖို့ခေါင်းထဲမှာစဉ်းစားထားကတ်။ မသီခင် ရခိုင်တိုင်းပြည်နန့်လူမျိုးအတွက် တစ်ခုခုလုပ်ပြခ။ မလုပ်ရသိမ့်ကေ ဇာလုပ်နိုင်လဲ ၊ ဇာလုပ်သင့်လဲ ကိုယ့်စွာကိုယ်မေး။ အလဟဿ အချိန်တိဖြုန်းမနီကတ်ကေ့လို့ တိုက်တွန်းလိုက်ပါရေ။ လူ့ဘဝက အနှစ်သာရမဟိ၊ လွတ်မြောက်ခွင့်မဟိ၊ အဖိနှိပ်ခံဘဝနန့်နီနီရကေ တန်ဖိုးမဲ့လူသားပါရာ။ တန်ဖိုးဟိလူသား၊တန်ဖိုးမြင့်လူသားဖြစ်ခွင့်ရဖို့ ကျနော်ရို့ အေ "ဗမာ-ရခိုင်စစ်ပွဲ"မှာ အနိုင်တိုက်ကတ်ပါဖို့။ အောက်သားတိအနီနန့်ယင်းသူရို့ဆိုနီရေ "ကမ္ဘာမကျီ" တေးခြင်းပိုင် မကျီပွဲတိက,မကန်ဆက်လို့ဆွဲကတ်ရဖို့သိမ့်။ ရခိုင်လူမျိုးတိကို ဇာပိုင်နှိပ်စက်၊ ဇာပိုင်ပြင်ခရေဆိုစွာမျိုးတိအတွက်က ဇာခါလေ့သင့် မေ့လီဖို့မဟုတ်။ ခံရရေလူတိက တစ်ခါလေ့ မိလီဖို့မဟုတ်ဆိုရေအတိုင်းရာ။

ရခိုင်လူမျိုး Dr.ညိုထွန်းအောင် ၂၀၁၉ ခုနှစ်၊ ဇွန်လ(၁၁) ရက်၊ အင်္ဂါနိ။ Credit picture