အရသာ

article

Date : 03-Feb-2021

ကိုယ်အားပီးရေအသင်းအနိုင်ရရေအခါ ဇာသူမဆိုပျော်ကတ်တေ။ အေနိ သန်းခေါင်ကျော် ( ညဉ့်) ကန်ရေဘောလုံးပွဲမှာ မန်ချက်စတာယူနိုက်တက်အသင်းက ဆောက်သမ်တန်ကို အိမ်ကွင်းမှာ (၉) လုံးသွင်းပနာ အနိုင်ကျင့်လားခရေ။ နှစ်ပေါင်း(၂၀) အတွင်း (၆) ဂိုးအထက်သွင်းခရေပွဲတစ်ပွဲလေ့ဖြစ်တေ။

ပွဲစလို့(၂) မိနစ်လောက်မှာ ဆောက်သမ်တန်က အနီကဒ်နန့်အထုတ်ခံလိုက်ရလို့ တစ်ယောက်အသာနန့်ကဇပ်ရရေပွဲလို့ဆိုလို့ရရေ။ ဆောက်သမ်တန်ကသွင်းလို့ဝင်ရေတစ်ဂိုးကိုလည်း VAR နန့်ဆုံးဖြတ်ရေအခါ ဂိုးမပီး။ ပွဲပြီးခါနီးမှာလည်း နောက်ထပ်အနီကတ်(၁) ။ ဆောက်တမ်တန်အတွက် အနီကတ်လက်ဆောင်(၂) ခုရခရေပွဲလေ့ဖြစ်တေ။

ပထမပိုင်း(၄) ဂိုးပြတ်နန့် ဦးဆောင်နိုင်ခရေ။ ယင်းအထဲမှာ Own Goal တစ်ဂိုးပါရေ။ တန်းတူ၊ လူအရီအတွက်တူကန်ကေတော့ အေလောက်ဂိုးပြတ်ဖို့စွာတော့မဟုတ်။

အေနှစ် ပရီးမီးယားဂိလ်ပြိုင်ပွဲက အယင်နှစ်တိထက်ပိုလို့ပြင်းထန်ရေဆိုခါ ဂိုးကိုရသလောက်သွင်းကတ်တေ။ အမှတ်တူဆိုကေ ဂိုးကွာခြားချက်ကိုကြည့်ရေဆိုခါ ရသလောက်ကြိုးထားမှ။

ဆိုခါ မန်ယူ အားပီးရေလူတိအဖို့ ပျော်ကတ်တေနှန်းရာ။ အေနိပိုင် ဂိုးပြတ်မြူးရေပွဲကြောင့် မန်ယူပရိသတ်အပါအဝင် မန်ယူကဇပ်သမားတိကတော့ စိတ်တူကိုယ်တူ အပျော်နန့်အရသာတော့ ထပ်တူကျလီကတ်ဖို့။

ရခိုင်လူမျိုး Dr.ညိုထွန်းအောင်

၂၀၂၁ ခုနှစ်၊ ဖေဖော်ဝါရီလ(၃) ရက်၊ ဗုဒ္ဓဟူးနိ။

Share on social