"ဘဝင်နွမ်းညှိုး ဂျူလိုင်မိုး"

အဝေ....သူငယ်ချင်း

တဖွဲဖွဲပြိုကျနီရေ ဂျူလိုင်မိုးရီစက်တိကြားထဲမှာ ဝမ်းနည်းခြင်းအထိမ်းအမှတ်နန့်တိုင်တဝက် လွှင့်တင်ထားရေ မင်းရို့ ငါရို့တိ၏ အာရက္ခနိုင်ငံ အောင်လံတော်အောက်မှာ ကျဆုံးခရေအာဇာနည်အတွက် အခမ်းအနားစွာ မင်းအတွက်ပြုလုပ်တေဘဝင်နွမ်းညှိုး ဖွယ်ရာ အခမ်းအနားတရပ်ပါရာဝေ။

ဒေအခမ်းအနားစွာ ငါရို့တိအားလုံးအတွက် တသက်လုံးအမှတ်ရနီဖို့ အဖြစ်အပျက်တခုရာ။ မိုးဦးကျရာသီ ဆိုကေလေ့ ရဲဘော် ရဲဘက်တိအားလုံး သီနတ်မြှောက်အလေးပြုနီတုန်း ကြားလိုက်ရရေ မိုးကြိုးသံစွာ သူရဲကောင်းပီပီ အသက်စွန့်လွှတ်ခရေ အာရက္ခနိုင်ငံတော်၏ အာဇာနည် သူရဲကောင်းတယောက် ဖြစ်ကြောင်းကို သက်သီပြပီးရေလို့ ငါထင်မြင်မိရေ။

ရဲဘော်ရဲဘက်တိအားလုံးက မင်းကိုဒေပိုင်အလေးပြုနီရေပိုင် ကျန်ဟိရေ မင်း၏မိသားစု၊ ညီအစ်ကို မောင်နှမ၊ ဆွီမျိုးသားချင်းတိ လေ့သင့် မင်း၏ ခမ်းနားအပြောင်မြောက်ဆုံး၊ အတောက်ပဆုံးလုပ်ရပ်တိ အတွက် ရက်ပြတ်ဂုဏ်ယူနီကတ်ဖို့စွာရာ။ ရဲရင့်မှု၊ သတ္တိ ကောင်းမှု၊ အမိန့်တာဝန်ကို ကျီပွန်စွာထမ်းရွက်မှု၊ မျိုးချစ်စိတ်ဓါတ်ပြင်းထန်ပြီးကေ တာဝန်ယူလိုစိတ်ဟိမှု၊ အနစ်နာခံ တတ်မှု၊ စွန့်လွှတ်စွန့်စားလိုမှု၊ သူရဲကောင်းပီသမှုဆိုရေ ဂုဏ်ပုဒ်တိစွာ မင်းကိုယ်တိုင် မင်းသွီးနန့်ရီးထိုးခရေ မင်း၏သမိုင်းတိရာ ဖြစ်တေ။

မင်း မှတ်မိဖို့သိမ့်ရာ.......

ငါဆိုရေအကောင်စွာ တော်လှန်ရီးအကြောင်းကို နကန်းတလုံးသိရေအကောင်မဟုတ်ပယှောင်၊ စိတ်လေ့ဝင်စားစွာ မဟုတ်။ တော်လှန်ရီး၏ ဆင်းရဲဒုက္ခ၊ မမြင်နိုင်ရေအခက်အခဲအကြောင်းတိကို ကြောက်လို့ ဂေါင်းကိုက်တေ၊ ဖင်နာရေ၊ အီးယောင်.. နီမကောင်း၊ စာမိန်းပွဲဟိရေ၊ ဘွဲ့ယူရဖို့သိမ့်၊ ရည်းစား ပူညံပူညံလုပ်ဖို့စွာ ကြောက်လို့ဆိုပနာ ဝိလည်ကြောင်ပတ်လုပ်နီရေကြားထဲက မင်း၏ အပြောအဆို၊ စည်းရုံးရီး လိမ္မာပါးနပ်မှုအောက်မှာ ငါစွာ မရောက်ချင်ကေလေ့ တော်လှန်ရီးလမ်းကြောင်းထက်ကို ရောက်လာရရေ။

အစခါက ငါစွာ "မလုပ်ချင်ရေအလုပ်ကိုလုပ်ရရေ" ဆိုပြီးကေ မင်းကို အပြစ်မြင်မိခကေလေ့သင့် အဂုအချိန်မှာတော့ခါ ဒေပိုင် မပြီးဆုံးသိမ့်ရေသမိုင်းပီးတာဝန်ကို ကျီကျီနပ်နပ်ထမ်းဆောင်နီရရေအတွက် ကိုယ့်စွာကို ကောင်းကြီးဂုဏ်ယူရေ။ ယင်းအတွက် ကြောင့်နန့်လေ့ မင်းကို ကျေးဇူးတင်ပြီးကေ အလေးပြု နီဖို့စွာရာ...

အဝေသူငယ်ချင်း......

တော်လှန်ရီးနယ်မြီကို ခြီချပြီးခါကပင် အမြဲတမ်းပိုင် ပြောပြောနီရေ မင်း၏တော်လှန်ရီး အတွိအကြုံ၊ သင်ခန်းစာတိစွာ ရဲဘော် ရဲဘက်အားလုံးအတွက် အညောင်းပြေအညာပြေ အားဆီးတခွက်လို့ငါမြင်ရေ။

မင်းပြောနီရေအထဲက "တော်လှန်ရီးသတိ" "လုံခြုံရီးသတိ"ဆိုရေ စကားလုံးစွာ ရဲဘော်ရဲဘက် အားလုံး အလီးထားကတ်တေ စကားလုံးဖြစ်တေပိုင် တော်လှန်ရီးသစ္စာ၊ တော်လှန်ရီးခံယူချက်၊ တော်လှန်ရီးအယူအဆ၊ တော်လှန်ရီးသဘောထား၊ တော်လှန် ရီးကျိန်စာ၊ တော်လှန်ရီးပါရာဇိက ရို့ကို မဆုံးနိုင်ရေ တထောင့်တည ပုံပြင်အဖြစ် အာပေါင်အာရင်းသန်သန် စကားလုံးကြွယ်ကြွယ်နန့် ရဲဘော်ရဲဘက်အားလုံး နားလည်အောင် ပြောပြနိုင်ရေမင်းကို ကျန်ဟိခရေရဲဘော်ရဲဘက်အပေါင်းရို့က အမြဲတမ်း သတိရနီပြီးကေ အလေးပြုကတ်ဖို့စွာ အမှန်ဗျာယ်...။

မင်းရို့ငါရို့တိ တိုက်ကင်းလှည့်ရင်း သမိုင်းပီးတာဝန်ကျီပွန်ရေ ရက္ခိုင်မျိုးချစ်တော်လှန်ရီးသမားတိ၏ အုတ်ဂူတိကိုတွိတိုင်း မင်းပြောခရေ စကားကို ငါ..ဒေနိထက်ထိ မှတ်မိနီသိမ့်ရေ။ "အစ်ကိုကြီးရို့ ကျဆုံးခရေ ဒေနီရာသို့ ငါစွာ.. ငိုကြွီးဖို့လာစွာမဟုတ်။ အစ်ကိုကြီးရို့၏ မပြီးဆုံးသိမ့်ရေ သမိုင်းပီးတာဝန်ကို ထမ်းဆောင်ဖို့ ရောက်လာစွာ ဖြစ်တေ" ဆိုစွာကိုလေး ဝေ....။ အေစကားကတော့ ပါပလိုနီရူဒါ၏ ကဗျာထဲက စာသားချေတခုကို အားကျအတုယူလို့ပြောစွာရာဆိုပြီးကေ နီရူဒါ၏ ယင်းကဗျာအကြောင်းကို ပြန်ပြောပြဖူးစွာ ငါမှတ်မိနီသိမ့်ရေ။

ရက္ခိုင့်ကံကြမ္မာကို ရက္ခိုင်သားတိလက်နန့်ဖန်တီးနိုင်ရီးအတွက် အရေးအပါဆုံးတခုဖြစ်တေ တော်လှန်ရီး လမ်းကြောင်းကို တတူတူဖြတ်သန်းနီတုန်း ရန်သူ့စခန်းကိုဝင်တိုက်ရင်း သူရဲကောင်းပီပီကျဆုံးခရပြီးကေ တော်လှန်ရီး နယ်မြီက အစောကြီး ထွက်ခွာလားရရေမင်းအတွက် ရဲဘော်ရဲဘက်အပေါင်းက မင်း၏သူရဲကောင်း ဆန်ရေ လုပ်ရပ်တိကို ဂုဏ်ယူနီကတ်ဖို့စွာရာ။

ဇာအလုပ်ကို ပင်လုပ်လုပ် သူများထက်စောပြီး လုပ်ရမှကျီနပ်တတ်တေ၊ အနစ်နာခံတတ်တေ၊ စိတ်အီးပြီး ဂေါင်းဆောင်ပီသရေ မင်းစွာ သမိုင်းပီးတာဝန် ကျီပွန်ခရေ အကြောင်း ရဲဘော်ရဲဘက်အားလုံးက နားလည် သဘောပေါက် လက်ခံထားကတ်စွာရာ။ အခုလေ့သင့် မင်းစွာ ရဲဘော် ရဲဘက်အပေါင်းရို့ကို အစောကြီးထွက်ခွာ ကြောခိုင်းလားခဖို့ဗျာယ် ကာဝေ...။

သူငယ်ချင်း မင်းကတော့ကေ ရှိကလားခရေ အစ်ကိုကြီးရို့၏ လမ်းစဉ်အတိုင်း သမိုင်းပီးတာဝန်ကို ကျီပွန်ခပြီး ဗျာယ်နန်း....။

လောကမှာ မွီးတနိ၊ သီတနိလို့ ဆိုကတ်ကေလေ့သင့် သီစွာမှာတော့စောလို့သီခြင်း၊ နောက်ကျမှသီခြင်း စရေ သီခြင်းတရား အမျိုးမျိုးထဲက မင်းစွာ အချိန်မတန်ဘဲ စောပနာသီခြင်းလို့ ငါမှတ်ယူရေ။ "အာရက္ခနိုင်ငံတော်နန့် ရက္ခိုင်လူမျိုးရို့အတွက် သူရဲကောင်းပီပီ အသက်ပီးခရစွာလောက် မွန်မြတ်တေ အလုပ်မဟိ" လို့ခံယူထားရေမင်းအတွက် အာရက္ခနိုင်ငံတော်နန့် ရက္ခိုင်လူမျိုးတိက အမြဲတမ်းအမှတ်ရနီဖို့စွာရာ ။ ရက္ခိုင့်အာဇာနည်သူရဲကောင်းတိထဲက တဦးလို့ နှောင်းလူတိရင်ဘတ်ထဲမှာ မင်းစွာ ထာဝရ ရှင်သန်နီဖို့စွာရာ။

မင်း စိတ်ချလီ သူငယ်ချင်း.....

ငါရို့တိအလှည့်မှာခါလေ့သင့် မညံ့စီရဝေ။ အာရက္ခတိုင်းပြည်ကိုတည်ဆောက်နီတုန်း အမျိုးသားလွတ်မြောက်ရီး တိုက်ပွဲကာလမှာ မင်းရီးထိုးခရေ မင်း၏သွီးစက်တိစွာ အလကားမဖြစ်စီရ။ မင်းရို့တိ၏သွီးစက်တိမခြောက်သိမ့်ခင် မင်းရို့ငါရို့ ထုဆစ်နီရေ "ရက္ခိတလမ်းစဉ် အကောင်အထည်ပေါ်ရီး"၊ "ရက္ခိုင့်ကံကြမ္မာ ရက္ခိုင့်လူမျိုးလက်နန့် ရီးထိုးရီး" ဆိုစွာတိကို ဆက်လုပ်နီဖို့စွာရာဝေ။

အဝေး..သူငယ်ချင်း တိုက်တိုက်ဆိုင်ဆိုင်ဗျာယ်ကာဝေ။ ဂနိခါ ဂျူလိုင်(၁၉)ရက်မလား။ မင်းရို့ငါရိုတိ ကျောင်းသားချေဘဝခါ "ဆယ့်ကိုးဂျူလိုင် မမိနိုင်"ဆိုပြီးကေ စာစီစာကုံးတိရီး၊ ကဗျာတိရီးပြီးကေ ပြိုင်ပွဲဝင်ခ ကတ်တေ။ ပန်းချီအနုပညာကို ချစ်မြတ်နိုး ရေ မင်းစွာ အာဇာနည်ဆိုရေဂေါင်းစဉ်နန့် ကိုယ့်ရုပ်ပုံ ကိုဆွဲဗျာယ် ပြိုင်ပွဲဝင်ဖူးခရေ တနိကို ငါမှတ်မိနီသိမ့်ရေဝေ။ ပြိုင်ပွဲကအပြန် တဖွဲဖွဲပြိုဆင်းနီရေ ဂျူလိုင်မိုး ထဲမှာ ထီးချေ တဆောင်ကိုနှစ်ယောက်ဆောင်းဗျာယ် ငါရိုသူငယ်ချင်းနှစ်ယောက်အိမ်ပြန် ခကတ်တေ အချိန်ကို ပြန်မြင်ယောင် လာမိကေ ငါ့ရင်မှာဆို့နင့်ပြီးကေ ဘဝင်ညှိုးနွမ်းရရေဝေ။

အဂုအချိန်မှာ ယင်းဖြစ်ရပ်တိစွာ အဂယောင့်ဖြစ်ခလီဗျာယ်လာလို့ ငါတွေးနီမိရေ။ အာဇာနည်ဆိုရေ ဂေါင်းစဉ် အောက်မှာ ကိုယ့်ရုပ်ပုံကို ကိုယ်ဆွဲပြီးကေ ပြိုင်ပွဲဝင်ခရေ ပန်းချီအနုပညာမှာဝါသနာထုံသူ မင်းတယောက် ဧကန် စစ်စစ် အာဇာနည်ဖြစ် ရဗျာယ်ကာ။ အချေခါကပန်းချီပုံစွာ အနာဂတ်မင်းဘဝ အတွက်နိမိတ်ပုံလားချင့်ဝေ။ တိုက်ဆိုင်လိုက်တေပင်နန်း....။

သူငယ်ချင်း.. မင်းရို့ငါရို့အချေခါကဆင်နွှဲဖူးခရေ အာဇာနည်နိဆိုစွာက ငါရို့မင်းရို့ရက္ခိုင်အမျိုးသား လွတ်မြောက် ရီးနန့် လုံးဝမပတ်သက်တေ အတုအယောင်နိတရက်ရာဝေ။ ရက္ခိုင်ရနံ့မသင်းမြဘဲ ရက္ခိတဝိဉာဉ်ဆိတ်သုဉ်းရေ အဓိပ္ပါယ်မလီးနက်တေ နိတရက်ရာ ဖြစ်တေ။ အဂုအချိန်ခါမှာတော့ကေ ငါရို့မင်းရို့ရက္ခိုင်လူမျိုးတိအတွက် စစ်မှန်ရေအာဇာနည်နိ စစ်စစ်ကို ကျင်းပပြု လုပ်ခဗျာယ်ဝေ။ မင်းအတွက် ငါဂုဏ်ယူရေပိုင် မင်းကိုယ်မင်းလေ့သင့် ဂုဏ်ယူနိုင်ပါစီဝေ သူငယ်ချင်း...။

အာရက္ခနိုင်ငံတော်တေးခြင်းကို အိုလံပစ်ပြိုင်ပွဲမှာဆိုရရေတနိ ယင်းအရသာနန့်လွတ်လပ်ရီးတေးသံကို ငါကိုယ် တိုင် ပြောပြသီဆိုဖို့ မင်းအုတ်ဂူရှိ အရောက်လာခဖို့စွာရာ။

အာရက္ခနိုင်ငံတော်နန့် ရက္ခိုင်လူမျိုးအတွက် သမိုင်းပီးတာဝန် ကျီပွန်ရေ၊စစ်သားကောင်းပီသရေမင်းအတွက် အမြဲတမ်း ဂုဏ်ယူ နီဖို့စွာရာပါဝေ..။ မင်းပယှောင် သမိုင်းပီး တာဝန်ကျီပွန်ရေ အာရက္ခစစ်သားတော်တိအများကြီး ပေါ်ပေါက်လာနိုင်စီဖို့ တဖွဲဖွဲ ပြိုဆင်းလာနီရေ ဂျူလိုင်မိုးရီစက်တိအောက်မှာ ဘဝင်နွမ်းညှိုးစွာနန့် အားတင်းပနာ ဆန္ဒပြုရင်း...........။

ရက္ခိုင်အမျိုးသားတော်လှန်ရီးလမ်းကြောင်းပေါ်လျှောက်လှမ်းရင်း အာရက္ခနိုင်ငံနန့် ရက္ခိုင်လူမျိုးအတွက် အသက်၊ သွီး၊ချွေး ဘဝ၊ မိသားစုတိကို စွန့်လွှတ်အနစ်နာခံ ပီးဆပ်လားခကတ်တေ အာဇာနည်သူရဲကောင်းအပေါင်းရို့အား ဦးညွတ်ဂါရဝပီးလျက်…။

ရခိုင်လူမျိုး Dr. ညိုထွန်းအောင်

၂၀၁၄ ဇူလိုင်လ (၁၉) ရက်။

လွန်ခရေ (၈) နှစ်က ရီးခရေစာကို အေနိ ၂၀၂၂ ခုနှစ်၊ ဇူလိုင်လ(၁၈) ရက်နိမှာ တဖဲ့ချေ ပြင်ဆင်ထားပါရေ။

စာလုံးပေါင်းသတ်ပုံအနီနန့် အရီအတွက်ပြပုဒ် (တစ်) စာလုံးပေါင်းကို ရခိုင်သင်ရိုးညွှန်းတမ်း ထဲက အတိုင်း "စသတ်"မပါဘဲနန့် သုံးထားပါရေ။