၂၀၁၉ ခုနှစ်၊အောက်တိုဘာလ(၁၉/၂၀) ရက်များတွင် မြောက်ဦးမြို့နယ်၊ လက္ကာရွာအတွင်း၊လက္ကာရွာပတ်ဝန်းကျင် နှင့်လက္ကာရွာနှင့်ဝေသာလီရွာအကြား တွင် မြန်မာစစ်တပ်၏ နယ်လှည့်သောင်းကျန်းသူတပ်မ(၅၅) လက်အောက်ခံတပ်ရင်းများနှင့် ရက္ခိုင့်တပ်တော်တို့ ပြင်းထန်စွာတိုက်ပွဲများဖြစ်ပွားခဲ့သည်။ နှစ်ရက်တာကာလတိုက်ပွဲများအတွင်း တပ်မ(၅၅) လက်အောက်ခံတပ်ရင်းများမှ သေဆုံးသူအရေအတွက်(၃၅) ဦးအထက်ရှိခဲ့ပြီးသေဆုံးသူနှင့်ဒဏ်ရာရရှိသူအရေအတွက်မြင့်တက်လျှက်ရှိသည်။ ထွက်ပြေးသူများလည်းများပြားလျှက်ရှိသည်။ ထို့အပြင် မင်းပြားမြို့နယ် နှင့် ပုဏ္ဏားကျွန်းမြို့နယ်အတွင်း၌လည်းတိုက်ပွဲများဆက်လက်ရှိခဲ့သည်။ ရခိုင်ဒေသအတွင်းနေထိုင်ကြသောပြည်သူလူထုများကို စိတ်ပိုင်းဆိုင်ရာဒုက္ခအမျိုးမျိုးပေးနေသည့်အပြင် တရားလက်လွတ်သတ်ဖြတ်နေသော တပ်မ(၅၅) လက်အောက်ခံတပ်ရင်းများအား ရက္ခိုင့်တပ်တော်မှ လက်တုံ့ပြန်တိုက်ခိုက်ခြင်းဖြစ်သည်။ လက္ကာရွာအတွင်းရှိ စာသင်ကျောင်း၊ လူနေအိမ်များ၊ ကန်ဘောင်နံဘေးကို ခံတပ်သဖွယ်အသုံးပြုကာ ပစ်ခတ်တိုက်ခိုက်နေသော တပ်မ(၅၅) လက်အောက်ခံတပ်ရင်း( အမည်စုံစမ်းဆဲ) အား ရက္ခိုင့်တပ်တော်မှ အောက်တိုဘာလ(၁၉) ရက်၊ နံနက်(၆) နာရီမှစတင်ထိုးစစ်ဆင်တိုက်ခိုက်ခဲ့သည်။ နေ့လည်(၁၂) နာရီခန့်အထိ (၆) နာရီနီးပါးကြာအပြန်အလှန်ပစ်ခတ်တိုက်ခိုက်မှုများနှင့်အတူ တိုက်ပွဲသည်ပြင်းထန်ခဲ့ပြီး ရန်သူ့ဖက်မှ အထိအခိုက်အကျအဆုံးများရှိခဲ့သကဲ့သို့မိမိတို့ဖက် မှလည်း အသက်ပေးဆပ်စွန့်လွှတ်ခဲ့ရသော အာရက္ခစစ်သည်တော်အချို့၊ဒဏ်ရာရစစ်သည်တော်အချို့ရှိခဲ့သည်။ နံနက်(၈) နာရီ(၅၀) မိနစ်တွင်လည်း "သင်းကျစ်တောင်"ဖက်မှ စစ်ကူလာသော မြန်မာစစ်တပ်အား စစ်ကူပေး၍မရအောင် ရက္ခိုင့်တပ်တော်မှ "လက္ကာရွာနှင့်ဝေသာလီရွာ"အကြား တွင်အကောင်းဆုံးဟန့်တားတိုက်ခိုက်နိုင်ခဲ့သည်။ အောက်တိုဘာလ(၁၉) ရက်နေ့၏တိုက်ပွဲနှစ်ပွဲအတွင်း မြန်မာစစ်တပ်ဖက်မှ အနည်းဆုံး(၁၀) ဦးသေဆုံးခဲ့ပြီး ထိခိုက်ဒဏ်ရာရသူများသည် (၁၀) ကျော်ရှိခဲ့သည်။ ဤတိုက်ပွဲများအတွင်း ရန်သူ၏ RPG-7 ဗုံးသီး( ၁၅) လုံး၊ ၆၀ မမဗုံးသီး(၂၀) လုံး၊ ဆက်သွယ်ရေးဆက်ကြီး(၂) လုံး၊ မိုင်း၊ လက်နက်ခဲယမ်း၊ ဆေးဝါးပစ္စည်း၊ MA ကျည်(၃၅၁၇ တောင့်)၊ အပါအဝင် စစ်အသုံးအဆောင်ပစ္စည်းများ၊ ဖုန်း နှင့် ဆက်စပ်ပစ္စည်းများ၊ရိက္ခာအချို့ နှင့် စာရွက်စာတမ်းအချို့ကို ရက္ခိုင့်တပ်တော်မှသိမ်းဆည်းရမိခဲ့သည်။ မင်းပြားမြို့နယ်၊ ကျော်ကရွာ အရှေ့မြောက်ဖက်(၁.၇) ကီလိုမီတာအကွာအဝေးရှိတောင်တန်းပေါ်တွင်လည်းကောင်း၊ ပုဏ္ဏားကျွန်းမြို့နယ်၊ အောင်မကျော်ရွာမြောက်ဖက်၊ မင်းမချောင်းထဲတွင်လည်းကောင်း၊ ပုဏ္ဏားကျွန်းမြို့နယ်၊ အထက်မြတ်လှဲ(မြိုရွာ) အနောက်ဖက်(၂) ကီလိုမီတာအကွာအဝေးရှိတောင်တန်းပေါ်တွင်လည်းကောင်း အောက်တိုဘာ(၁၉) ရက်နေ့၌တိုက်ပွဲများဖြစ်ပွားခဲ့သည်။ အထက်မြတ်လှဲ(မြိုရွာ) အနောက်ဖက်တောင်တန်းပေါ်တွင်ဖြစ်ပွားခဲ့သောတိုက်ပွဲအတွင်း၌လည်း မြန်မာစစ်တပ်ဖက်မှ သေဆုံးသူအရေအတွက်များပြားခဲ့သည်။ မိမိတို့တပ်ဖွဲ့ဝင်များသတင်းပေးပို့ချက်အရ ရန်သူ့ဖက်မှ သေဆုံးသူ(မျက်မြင်) ၁၀- ဦးအထက်ရှိခဲ့ကြောင်းသိရှိရသည်။ ၂၀၁၉ ခုနှစ်၊ အောက်တိုဘာလ(၂၀) ရက်၊နံနက်(၈) နာရီ (၅၀) မိနစ်ခန့်တွင်လည်း မြောက်ဦးမြို့နယ်၊"လက္ကာရွာတံတားအနီး"တွင် အင်အား(၅၀) ခန့်ပါတပ်မ(၅၅) လက်အောက်ခံစစ်ကြောင်းတစ်ခုအား ရက္ခိုင့်တပ်တော်၊ ကွန်မန်ဒိုများမှဖြတ်တောက်တိုက်ခိုက်ခဲ့သည်။ ရန်သူ့ဖက်မှ အနည်းဆုံး(၅) ဦးသေဆုံးပြီး ဒဏ်ရာရသူအများအပြားထပ်မံရှိခဲ့သည်။ ရန်သူသည် သေဆုံးသူများနှင့်ဒဏ်ရာရသူများကို ကျောက်တင်ကားဖြင့် မြောက်ဦးမြို့ဖက်သို့သယ်ယူသွားခဲ့သည်။ မိမိတို့အနေဖြင့် ရန်သူ၏၎င်းစစ်ကြောင်းပါနောက်ကျန်တပ်ဖွဲ့ဝင်များကိုလိုက်လံရှင်းလင်းတိုက်ခိုက်လျှက်ရှိသည်။ ၂၀၁၉ ခုနှစ်၊ အောက်တိုဘာလ(၂၀) ရက်၊ ညနေ(၄) နာရီခန့်တွင် အထိနာနေသော အင်အား(၂၀၀) ခန့်ရှိသော တပ်မ(၅၅) သည် လက္ကာရွာအရှေ့ဖက်ရှိတောင်တန်းတွင်ထိုးစစ်ဆင်တိုက်ခိုက်မှုကိုပြုလုပ်ခဲ့သည်။ မိနစ်(၉၀) ခန့်ရန်သူ့ထိုးစစ်အတွင်း ရန်သူ့ဖက်မှထပ်မံ၍(၁၀) ဦးခန့်ကျဆုံးပြီး (၁၅) ဦးကျော်ထပ်မံဒဏ်ရာရရှိခဲ့သည်။ ထို့နောက်ရန်သူသည် တပ်လန်သွားပြီး အဝေးမှလက်နက်ကြီးများဖြင့်သာပစ်ခတ်တိုက်ခိုက်နေခဲ့သည်။ ၂၀၁၉ ခုနှစ်၊ အောက်တိုဘာလ(၂၀) ရက်၊ ဘူးသီးတောင်မြို့နယ်၊ အုတ်တောင်ရွာ အရှေ့မြောက်ဖက်၊ "အရိုးကျတောင်တန်း" ပေါ်တွင် နံနက်(၉) နာရီခန့်တွင်လည်းကောင်း၊ ပလက်ဝမြို့နယ်၊ ခမောင်းဝရွာမြောက်ဖက်တောင်တန်းပေါ်တွင်လည်းကောင်း မိနစ်အနည်းကြာထိတွေ့မှုဖြစ်ပွားခဲ့သည်။ မြန်မာစစ်တပ်သည် မိမိတို့ရှိရာနေရာသို့ဝင်ရောက်လာသောကြောင့်ထိတွေ့မှုဖြစ်ပွားရခြင်းဖြစ်သည်။ ရန်သူသည် ထိတွေ့မှုဖြစ်ပြီးနောက် တပ်ဆုတ်သွားသောကြောင့် တိုက်ပွဲဆက်လက်မဖြစ်ပွားခဲ့သော်လည်း လက်နက်ကြီး၊ MG-42 များဖြင့်အဝေးမှပစ်ခတ်တိုက်ခိုက်နေခဲ့သည်။ တပ်မ(၅၅) လက်အောက်ခံတပ်ရင်းများသည် ရခိုင်ကျေးရွာများရှိလူနေအိမ်များကို မီးရှို့ဖျက်ဆီးခြင်း၊ အရပ်သားပြည်သူလူထုများကို ဥပဒေမဲ့တရားလက်လွတ်ပစ်သတ်ခြင်း၊ ရွာအတွင်းရှိနေအိမ်များမှ ရွှေ၊ငွေအပါအဝင် အသုံးအဆောင်ပစ္စည်းများကိုခိုးယူခြင်းအပါအဝင် ဖျက်ဆီးခြင်းများကိုဆက်လက်ပြုလုပ်နေပါက မိမိတို့အနေဖြင့် ထပ်မံတုံ့ပြန်တိုက်ခိုက်သွားမည်ဖြစ်သည်။ ၂၀၁၉ ခုနှစ်၊ အောက်တိုဘာလ(၂၁) ရက်နေ့တွင်လည်း မြန်မာစစ်တပ်ဖက်မှ လက်နက်ကြီး၊လက်နက်ငယ်များဖြင့်တစ်ဖက်သတ်ပစ်ခတ်တိုက်ခိုက်နေမှုများ၊ နှစ်ဖက်အပြန်အလှန်တိုက်ပွဲများမှာဆက်လက်ရှိနေခဲ့သည်။ ၂၀၁၉ ခုနှစ် အောက်တိုဘာလ (၁၉)ရက် မှ (၂၁) ရက်နေ့အထိ ရခိုင်ပြည်တိုက်ပွဲသတင်းများအတွင်း မြန်မာစစ်တပ်၏တပ်မ(၅၅) လက်အောက်ခံတပ်ရင်းများမှ သေဆုံးသူ(မျက်မြင်) (၃၅) ဦးအထက်ရှိခဲ့ပြီး ဒဏ်ရာရရှိသူများမှာလည်း(၃၀) ဦးအထက်ရှိခဲ့သည်။ (( ရန်သူ့ထောက်ပို့စခန်းငယ်နှင့် လက္ကာရွာအနီးတိုက်ပွဲအတွင်းသိမ်းဆည်းရမိသော ပစ္စည်းများ၏ ဓာတ်ပုံများကိုရရှိပါက ထပ်မံတင်ပေးသွားပါမည်))

သတင်းနှင့်ပြန်ကြားရေး

ရက္ခိုင့်တပ်တော်