"(၂၂)နှစ်မြောက် ခိုင်ရာဇာနိ" လွန်ခရေ(၂၂) နှစ်က,၁၉၉၈ ခုနှစ် ဖေဖော်ဝါရီလ(၁၁) ရက်နိမှာ အိန္ဒိယနိုင်ငံ၊ အက်ဒမန်၊ လန်ဖော့ဒ်ကျွန်း Landfall Island ကျွန်းထက်မှာ အောက်သားနန့် ဘေးနားကတိုင်သားတိပေါင်းလို့လုပ်ကြံခရေအတွက်, AA(Arakan Army)စစ်ဦးစီးချုပ် ခိုင်ရာဇာအပါအဝင်ထိပ်ပိုင်းဂေါင်းဆောင်အချို့အသက်စွန့်လွှတ်လားခရရေ။ ရခိုင်တိအတွက် ဇာခါလေ့မမိန့်ဆိုရေနိတစ်နိဖြစ်တေ။ လူ၊လက်နက်အပြည့်နန့် စခန်းချဖို့ ခိုင်ရာဇာအပါအဝင် ထိပ်ပိုင်းဂေါင်းဆောင်တိစွာ ပင်လယ်ရီလမ်းကြောင်းနန့်တက်လာကတ်တေ။ ဘေးနားကတိုင်သားတိနန့် သဘောတူပီးသား။ ယေကေလေ့ မထင်မှတ်ထားစွာတိဖြစ်လားခရေ။ အကောက်ကြံပနာလုပ်ကြံခံလိုက်ရရေ။လုပ်နီကတ်တေလူတိဟိကေလည်း ထင်သလောက်တော့ခရီးမပေါက်ဆိုခါ တော်လှန်ရီးအဆက်ပြတ်လားရေလို့တောင်ဆိုလို့ရရေ။ ယင်းစပီးဘုတ်နန့်ပါလာရေကျန်ရေဂေါင်းဆောင်တိ အားလုံးလည်းအဖမ်းခံခရပနာအိန္ဒိယနိုင်ငံမှာထောင်ကျရေ။ လက်နက်မှောင်ခိုရောင်းရေလူတိအဖြစ်စွဲချက်တင်လို့။ကရင်ပြည်ကနီ, တူတူလိုက်ပါလာရေ,ကရင်လူမျိုးတိလည်းအဖမ်းခံရစွာမှာပါလားရေ။ အဂုတော့ ယင်းအဖမ်းခံရရေ တော်လှန်ရီးသမားတိလွတ်လားခဗျာယ်။ ယင်းလွတ်လာရေလူအများစုကဥရောပနန့်တတိယနိုင်ငံကိုရောက်လားစွာကများရေ။လက်ဟိတော်လှန်ရီးထဲမှာတော့ယင်းစီနီယာတိကိုမတွိသလောက်။ ရောက်ရေနီရာကရာ အမျိုးသားရီးမှာ နိုင်သလောက်ထမ်းကတ်တေအနီအထားလောက်ရာ။(မသိလို့လည်းဖြစ်ချင်ဖြစ်ပါဖို့) အေနိအချိန်အထိ,ရခိုင်အမျိုးသားတော်လှန်ရီးကိုဆင်နွှဲယင်း အသက်စွန့်လွှတ်လားခကတ်သော(ပြည်သူကအသိအမှတ်ပြုသတ်မှတ်ထားရေ)အာဇာနည်သူရဲကောင်းအပေါင်းကိုဦးညွတ်ရိုသီပီးပါရေ။ United League of Arakan(ULA)/Arakan Army ရက္ခိုင့်တပ်တော်က,ရှေ့ကဂေါင်းဆောင်တိ၏မပြီးသိမ့်ရေအိမ်မက်နန့် ရခိုင်တစ်မျိုးသားလုံးမျှော်လင့်နီရေ ရက္ခိတအိမ်မက်၂၀၂၀ Arakan Dream 2020 ကိုဆက်လို့အကောင်အထည်ဖော်နီရေ။ အေအချိန်မှာ အောက်သားတိအဓိကလုပ်နီစွာက ကျနော်ရို့ရခိုင်လူမျိုးအချင်းချင်းအကြား၊ ရခိုင်မျိုးနွယ်စုတိအချင်းချင်းအကြား၊ရခိုင်အတွင်းနန့်အပြင်အဖွဲ့အစည်းတိအချင်းချင်းအကြား၊ရခိုင်နန့်မဟာမိတ်လူမျိုးတိအချင်းချင်းအကြားမှာ အထင်အမြင်လွဲလားအောင်၊ပြိုလားအောင်,အာဏာ/မက်လုံး/အခွင့်အရီး/ဖေ့ချာတိပီးပြီးကေသတင်းအတု Fake News တိဖန်တီးလို့လုပ်နီရေဆိုစွာကို အထူးဂရုပြုသတိထားဖို့လိုပါရေ။ Internet ပိတ်ပြီးကေ အောက်သားတပ်ကလုပ်ချင်စွာလုပ်ပနာ လူမျိုးရေးအမုန်းတရားတိနန့် အရပ်သားတိကိုဦးတည်ပစ်မှတ်ထားလုပ်လာစွာတိတနိထက်တနိပိုများလာနီရေ။ အရှိန်အဟုန်/နိုးကြားမှုကောင်းနီရေArakan National Movement =ANM ရခိုင်အမျိုးသားလှုပ်ယှားမှုကိုရပ်တန့်လားအောင်နန့်လမ်းလွဲလားအောင်,အောက်သားတိက,စနစ်တကျလုပ်လာနီဆိုစွာကိုအထူးဂရုပြုကတ်ပါလို့အလီးအနက်ပြောလိုပါရေ။ နောက်တစ်ခေါက်,အေပိုင်စုစည်းညီညွတ်မှုအားကောင်းရေအနီအထားမျိုးကိုရောက်နိုင်ဖို့ကောင်းခက်ခဲလီပါဖို့။ ယေဇု ULA/AA နန့်လက်တွဲအလုပ်လုပ်ဖို့ဖိတ်ခေါ်ရေပိုင် ရောက်ရေနီရာက,တတ်နိုင်ရေအလုပ်ကိုလုပ်ပီးယင်းဝိုင်းရံပီးကတ်ပါလို့တိုက်တွန်းပြောကြားလိုပါရေ။ ဟိသမျှအလုပ်နန့်ဘဝကိုစွန့်လို့ ULA အတွက်အမျိုးသားရီးကိုဇောက်ချလုပ်ကိုင်ပီးဖို့နောက်ထပ်စစ်ကူရခိုင်တစ်ရာ(၁၀၀) 💯 လောက်ရခကေ “အာရက္ခနိုင်ငံတော်”ဆိုစွာကပိုလို့ပီပြင်လာဖို့ယုံကြည်ရေ။ ကောင်းအများမလို။ တစ်ရာလောက်ရာ။ အခြားတစ်ဖက်မှာ,ကိုယ့်လူမျိုးတိက,အတွင်းရန်သူတိဖြစ်မှန်းမသိဖြစ်နီကတ်တေပိုင်,ရန်သူ့အလုပ်ကို,ကိုယ့်ထမင်းကိုယ်စားပြီးလုပ်မှန်းမသိလုပ်နီကတ်တေလူတိ,တစ်ရက်ထက်တစ်ရက်,ပိုများလာနီစွာကိုတွိနီရရေ။ ဆင်ခြင်တုံတရားနန့်အသိတရားဟိကတ်လို့ ထပ်လို့သတိပီးပါရေ။ သတိပီးပီးဖို့လူတိဟိမှရာ,သတိဝင်တတ်တေအမျိုးရို့ကိုထပ်လို့သတိပီးလိုက်ပါရေ။ မဟုတ်ကေ ယင်းလူတိရေအမျိုးသားအကျိုးစီးပွားကိုပျက်စီးအောင်ပြုလုပ်သူတိအဖြစ်ကိုယ့်စွာကိုယ်တံဆိပ်ထုပြီးသားသူတိဖြစ်လီဖို့။ ကိုယ့်စွာကိုယ်တော့ အမျိုးသားသစ္စာဖောက်တံဆိပ်မကပ်ကပ်ဖို့ အထူးအလီးအနက်မှာလိုက်ရေ။ ယေဇု,ရှေ့ကိုလည်းကြည့်ကတ်ပါ။ ပြဿနာတစ်ခုကိုဘက်ပေါင်းစုံကမြင်အောင်ကြည့်တတ်ဖို့က အထူးလိုအပ်နီရေ။ပြဿနာတစ်ခုတည်းမှာဂျဲး,ခဲခဲမွိနီပနာရန်သူ့အလိုကျအကွက်ထဲမရောက်လားဖို့က အေခေတ်မျိုးဆက်တိအနီနန့်,ရန်သူထက်ပိုတော်နီဖို့လိုရေ။ ပိုလို့အကွက်ကျော်မြင်တတ်ဖို့လိုရေ။ ရန်သူထက်တော်အောင်ကြိုးစားကတ်ညီချေ/ညီမချေရို့။ အေနိအထိ ULA/AA အနီနန့်အောက်သားထောင်ချောက်ထဲမရောက်ဖို့/ရန်သူ့ဆန္ဒမပြည့်လားဖို့ စိန်ခေါ်မှု/အတားအဆီးတိကို သတိထားဖြတ်နီရရေအချိန်တိဖြစ်တေ။ တစ်စိချေတောင်မှားလို့မရရေအနီအထားတိနန့်လျှောက်နီရရေ။ တိုက်နီရေ AA ရဲဘော်တိအယောက်ချင်းက အာရက္ခနိုင်ငံတော်ကမြီသင်းနံ့ချေတိ မွှီးကြိုင်လာနီစွာကိုပိုလို့သတိထားမိနီကတ်တေ။ ယေဇု အေနိအချိန်မှာ အမျိုးသားလွတ်မြောက်ရီးတိုက်ပွဲကိုဆင်နွှဲချင်ရေဇာသူ့ကိုမဆိုလက်ကမ်းကြိုဆိုနီပါရေ။ အမှီအခိုကင်းရေရခိုင်တိဘဝပြန်ရောက်ဖို့က,ကောင်းတိုက်ရဖို့သိမ့်။ တိုက်ချင်ရေလူတိကိုစောင့်ကြိုနီပါရေ။ ကိုယ်တိုက်မှကိုယ်ရဖို့။ အခုလည်း ရခိုင်ပြည်မှာအောက်သားထိုးစစ်တိကနောက်တစ်ချီစနီဗျာယ်။ "အရီးကြီးကေပြော" လို့ပြောထားကတ်တေအမျိုးရို့"အရီးကြီးနီစွာမှာ ထိုဖက်ကမ်းတောင်ရောက်နီဗျာယ်လို့" ထပ်လို့ပြောလိုက်ပါရေ။ ရခိုင်လူမျိုး Dr.ညိုထွန်းအောင် ၂၀၁၈ ခုနှစ်၊ဖေဖော်ဝါရီလ (၁၁) ရက်၊ တနင်္ဂနွီ၊ခိုင်ရာဇာနိ မှာရီးခစွာကို အေနိ ခေတ်ကာလနန့်ညီအောင် ၂၀၂၀ ခုနှစ်၊ဖေဖော်ဝါရီလ(၁၁) ရက်၊ အင်္ဂါနိ မှာပြန်ရီးတင်ရေ။