ထို့အပြင် မြန်မာ့တပ်မတော်သည် တိုက်ပွဲများကြောင့် ရွာသူရွာသားများမရှိသည့်ကျေးရွာများ၊ မြန်မာ့တပ်မတော်၏ စစ်ရာဇဝတ်ကျူးလွန်မှု၊သတ်ဖြတ်မှုများကိုစိုးရိမ်သောကြောင့် တိမ်းရှောင်နေကြရ၍ ရွာသူရွာသားများမရှိသည့်ကျေးရွာများအတွင်းဝင်ရောက်ပြီး ရွာသူ၊ရွာသားများပိုင်ပစ္စည်းများကိုခိုးယူခြင်း၊ မယူနိုင်သည့်ပစ္စည်းများကိုဖျက်ဆီးခြင်းတို့ကို ပြုလုပ်လျက်ရှိသည်။

 မြန်မာ့တပ်မတော်သည် ကျေးရွာများအတွင်းမှထွက်ခွာပြီးသည့်နောက်ပိုင်းတွင်လည်း ရွာပတ်ဝန်းကျင်၊ ပုံမှန်လူသွားလမ်း၊ စိုက်ပျိုးရေးလုပ်ငန်းများသို့သွားရောက်သည့်လမ်းကြောင်းထက်၌ စွန့်လွှတ်မိုင်းများကိုထောင်ထားကာ အရပ်သားဒေသခံပြည်သူလူထုများအား အသက်အန္တရာယ်ထိခိုက်အောင်ပြုလုပ်လျက်ရှိသည်။ ယခုရက်သတ္တပတ်အတွင်း မြန်မာ့တပ်မတော်၏ စွန့်လွှတ်မိုင်းများကြောင့် အရပ်သားထိခိုက်သေဆုံးသည့်အရေအတွက်ပိုများလာခဲ့သည်။

သြဂုတ်လ(၂) ရက်နေ့၊ နံနက်(၁၁) နာရီ(၃၀) မိနစ်တွင် ရခိုင်- ဘင်္ဂလာနယ်စပ်မှတ်တိုင်(၇၁) BP-71 မှ အရှေ့တောင်ဖက်(၄) ကီလိုမီတာအကွာအဝေး(တနည်းအားဖြင့်) ပလက်ဝမြို့နယ်၊ ခန်ခတောင်၏အနောက်တောင်ဖက်(၁.၇) ကီလိုမီတာအကွာအဝေး၌ တိုက်ပွဲဖြစ်ပွားခဲ့သည်။ ရန်သူ(၁၀) ဦးခန့်အားသုတ်သင်ရှင်းလင်းနိုင်ခဲ့သည်။ ထို့အတူညနေ(၄) နာရီခန့်အချိန်တွင်လည်း ခန်ခတောင်၏အနောက်မြောင်ဖက်(၁.၃) ကီလိုမီတာအကွာအဝေး၌လည်းတိုက်ပွဲများဆက်လက်ဖြစ်ပွားခဲ့သည်။

စစ်ရာဇဝတ်တပ်ဖွဲ့မြန်မာ့တပ်မတော်၏ စကခ(၉)လက်အောက်ခံ ကျောက်တော်အခြေစိုက် ခမရ(၃၇၆) သည် မည်သည့်တိုက်ပွဲဖြစ်ပွားခဲ့ခြင်းမရှိဘဲ ကျောက်တော်မြို့နယ်၊ ကျောက်တလုံးကျေးရွာအတွင်းသို့၂၀၂၀ ပြည့်နှစ် သြဂုတ်လ(၃) ရက်၊ နံနက်(၈) နာရီ(၄၅) မိနစ်တွင် လူမျိုးရေးအမုန်းတရားများဖြင့် ပစ်ခတ်တိုက်ခိုက်ခဲ့သည်။ ထို့ကြောင့် ကျောက်တလုံးရွာသူ၊ ရွာသား(၄) ဦး ဒဏ်ရာပြင်းထန်စွာရရှိခဲ့သည်။

၂၀၂၀ ပြည့်နှစ်၊ သြဂုတ်လ(၃) ရက်၊ နေ့လည်(၁၂) နာရီခန့်အချိန်တွင်ရသေ့တောင်မြို့နယ်၊ အထက်နန်းရာရွာ(ရွာပျက်)၏ အနောက်ဖက် (၃) ကီလိုမီတာခန့်အကွာအဝေး၌ နယ်မြေရှင်းလင်းရေးလုပ်ငန်းများကိုပူးတွဲဆောင်ရွက်နေသော မြန်မာ့တပ်မတော် နှင့် မြန်မာနိုင်ငံရဲတပ်ဖွဲ့တို့ပါဝင်သောပူးပေါင်းတပ်ဖွဲ့နှင့် ရက္ခိုင့်တပ်တော်တို့ တိုက်ပွဲဖြစ်ပွားခဲ့သည်။ သြဂုတ်လ(၂) ရက်နေ့ကတည်းကပင် အဆိုပါပူးပေါင်းတပ်ဖွဲ့သည် မိမိတို့အားလာရောက်တိုက်ခိုက်၍တိုက်ပွဲဖြစ်ပွားခဲ့ပြီး သြဂုတ်လ(၃) ရက်နေ့တွင်လည်း ဒုတိယနေ့အဖြစ်ရက်ဆက်တိုက်ပွဲဖြစ်ပွားခဲ့ခြင်းဖြစ်သည်။

အထက်နန်းရာရွာ( ရွာပျက်) အနီး သြဂုတ်(၂/၃) ဖြစ်ပွားခဲ့သောတိုက်ပွဲများအတွင်း မြန်မာ့တပ်မတော် နှင့် မြန်မာနိုင်ငံရဲတပ်ဖွဲ့(နယ်ခြားစောင့်တပ်ဖွဲ့)ပူးပေါင်းတပ်ဖွဲ့ဝင်(၂၀) ကျော်အားသုတ်သင်ရှင်းလင်းနိုင်ခဲ့သည်။ သုံ့ပန်းအချို့ဖမ်းဆီးရမိခဲ့သည်။လက်နက်ခဲယမ်းအချို့လည်းသိမ်းဆည်းရမိခဲ့သည်။

ယခုတိုက်ပွဲများအတွင်း ရန်သူ့ဖက်မှအထိအခိုက်အကျအဆုံးများခဲ့သကဲ့သို့ထိခိုက်ဒဏ်ရာရသူများလည်းများပြားခဲ့သည်။

သတင်းနှင့်ပြန်ကြားရေး
ရက္ခိုင့်တပ်တော်