၂၀၂၀ ပြည့်နှစ်၊ ဇူလိုင်လ(၁) ရက်မှ (၅) ရက်နေ့အတွင်း ရခိုင်ပြည်တိုက်ပွဲသတင်းများနှင့် ရခိုင်ဒေသအခြေအနေများ

မြန်မာ့တပ်မတော်သည် ရခိုင်ပြည်၊ ရသေ့တောင်မြို့နယ်၊ကျောက်တန်းကျေးရွာအုပ်စုတလျှောက် နယ်မြေရှင်းလင်းရေးလုပ်မည်ဟု၂၀၂၀ ပြည့်နှစ်၊ဇွန်လ(၂၄) ရက်နေ့၌ကြေညာခဲ့ပြီးနောက်တွင်၎င်းတို့ကြေညာထားသည့်အတိုင်း နယ်မြေရှင်းလင်းရေးနှင့်အတူထိုးစစ်များကို လက်နက်ကြီးပစ်ကူအမြောက်အမြားဖြင့်ပြုလုပ်လျက်ရှိသည်။

အဆိုပါကိစ္စနှင့်ပတ်သက်၍နိုင်ငံတကာမှ စိုးရိမ်ပူပန်ကြောင်းထုတ်ပြန်ကြေညာချက်ထုတ်ခဲ့ပြီးနောက် မြန်မာ့တပ်မတော်မှ ၎င်းကြေညာချက်ကိုရုပ်သိမ်းခဲ့သည်။ သို့သော်လည်း လက်တွေ့မြေပြင်တွင်မူ နယ်မြေရှင်းလင်းရေးခေါင်းစဉ် နှင့်အတူ ထိုးစစ်ဆင်တိုက်ခိုက်မှုများကိုဆက်လက်ပြုလုပ်နေဆဲဖြစ်သည်။

ထို့ကြောင့် ရသေ့တောင်မြို့နယ်၊ မြောက်ဦးမြို့နယ်အတွင်းရှိ ကျေးရွာ(၁၀) ကျော်မှ ရွာသူရွာသားများမှာ တိုက်ပွဲများကြောင့်မဟုတ်ဘဲ မြန်မာ့တပ်မတော်၏ ခြိမ်းခြောက်မှု၊ သတ်ဖြတ်မှု၊ မုဒိမ်းကျူးလွန်မှုများကိုစိုးရိမ်သောကြောင့် တစ်သောင်းကျော်သောရွာသူရွာသားများမှာနေရပ်စွန့်ခွာတိမ်းရှောင်သူများအဖြစ်သို့ရောက်ရှိခဲ့ရသည်။

မြန်မာ့တပ်မတော်သည် စစ်ရာဇဝတ်ကျူးလွန်ခြင်း၊ ရပ်ရွာများအတွင်းစခန်းချတပ်စွဲခြင်း၊ အပြစ်မဲ့ပြည်သူလူထုများအား လူမျိုးရေးအမုန်းတရားများဖြင့်သတ်ဖြတ်ခြင်း၊ဖမ်းဆီးနှိပ်စက်ခြင်း၊ ရွာသူရွာသားများပိုင်ဆိုင်သည့် ပစ္စည်းဥစ္စာများကိုခိုးယူခြင်း၊ ဖျက်ဆီးခြင်းတို့အပြင် မုဒိမ်းမှုကျူးလွန်ခြင်းများကို ရခိုင်ပြည်အနှံ့လက်ရဲဇက်ရဲ အတင့်ရဲစွာဆက်လက်ပြုလုပ်လျက်ရှိသည်။

နယ်မြေရှင်းလင်းရေးဟုအကြောင်းပြပြီး ရခိုင်ဒေသအတွင်းနေထိုင်ကြသော ဒေသခံပြည်သူလူထုများကို လူမျိုးဖြုတ်ရှင်းလင်းရေးသို့ဦးတည်သော ပြစ်မှုမျိုးကိုကျူးလွန်လျက်ရှိသည်။

ရသေ့တောင်မြို့နယ်၊ ပလက်ဝမြိ့နယ်အတွင်း တိုက်ပွဲများကြီးကြီးမားမားမရှိသော်လည်း တိုက်ပွဲငယ်များရှိခဲ့သည်။

အထူးသဖြင့် ရသေ့တောင်မြို့နယ်၊ အောင်သာစည်ရွာ တောင်ဖက်ရှိ မိမိတို့တပ်ဖွဲ့ဝင်များအား စစ်ရာဇဝတ်နယ်ချဲ့မြန်မာ့တပ်မတော်သည်အင်အားအလုံးအရင်းဖြင့် ထိုးစစ်ဆင်တိုက်ခိုက်နေခဲ့သည်မှာ ဇွန်လ(၂၆) ရက်နေ့မှယနေ့ ဇူလိုင်လ(၅) ရက်နေ့ဆိုပါက(၁၀) ရက်အထိကြာမြင့်ခဲ့ပြီဖြစ်သည်။ သို့သော်လည်း အာရက္ခစစ်သည်တော်များမှ အကောင်းဆုံးခုခံတိုက်ခိုက်နိုင်ခဲ့သောကြောင့် ရန်သူသည်ရှေ့ဆက်မတိုးနိုင်ဘဲ လက်နက်ကြီးများကိုစုပြုံပစ်ခတ်ခြင်းများကိုသာပြုလုပ်နိုင်ခဲ့သည်။

ဇူလိူင်လအတွင်း၌ ပလက်ဝမြို့နယ်၏ နေရာအချို့၌ နှစ်ဖက်ရင်ဆိုင်ထိတွေ့မှု(၅) ကြိမ်ရှိခဲ့သည်။

သတင်းနှင့်ပြန်ကြားရေး
ရက္ခိုင့်တပ်တော်