မြန်မာ့တပ်မတော်၏ ဘူးသီးတောင်အခြေစိုက်၊ ခလရ(၂၃၃) တပ်ရင်း၊မြန်မာနိုင်ငံရဲတပ်ဖွဲ့တို့ပူးပေါင်းစစ်ကြောင်း နှင့် ရက္ခိုင့်တပ်တော် တို့ ထိတွေ့မှုဖြစ်

၂၀၂၀ ပြည့်နှစ်၊ ဇွန်လ(၂၃) ရက်

ရက္ခိုင့်တပ်တော်သည် အမျိုးသားပြန်လည်သင့်မြတ်ရေး နှင့် ပြည်တွင်းငြိမ်းချမ်းရေးကိုရှေးရှု၍ တစ်ဖက်သတ်အပစ်အခတ်ရပ်စဲခြင်းအား ညီနောင်မဟာမိတ်များနှင့် အကြိမ်ကြိမ်ကြေညာခဲ့ပြီးဖြစ်သည်။ ထုတ်ပြန်ထားသည့်အတိုင်းတိုက်ပွဲများမဖြစ်ပွားစေရန် ထိန်းသိမ်းခဲ့သော်လည်း မြန်မာ့တပ်မတော်၏ ရက္ခိုင့်တပ်တော်အပေါ်ကြည်း၊ရေ၊လေ ထိုးစစ်ဆင်တိုက်ခိုက်နေမှုများကြောင့်တိုက်ပွဲများဆက်လက်ရှိနေရခြင်းဖြစ်သည်။

တစ်ပြိုင်နက်တည်းတွင် မြန်မာ့တပ်မတော်သည် ရက္ခိုင့်တပ်တော်အား ထိုးစစ်ဆင်တိုက်ခိုက်နေမှုများကို ကိုရိုနာကူးစက်ရောဂါ ကာကွယ်ရေး၊ထိန်းချုပ်ရေး၊ တိုက်ဖျက်ရေးကာလ၌ပင်ဆက်လက်ပြုလုပ်နေဆဲဖြစ်သည်။

ထို့ကြောင့် ၂၀၂၀ ပြည့်နှစ်၊ ဇွန်လ(၂၂) ရက်၊ ညနေ(၅) နာရီ(၁၇) မိနစ်တွင် မြန်မာ့တပ်မတော်၏ ဘူးသီးတောင်အခြေစိုက်၊ ခလရ(၂၃၃) တပ်ရင်း၊မြန်မာနိုင်ငံရဲတပ်ဖွဲ့တို့ပူးပေါင်းစစ်ကြောင်း နှင့် ရက္ခိုင့်တပ်တော် တို့သည် အငူမော်-မောင်တော ကားလမ်းမအနီး၌ တစ်နာရီခန့်ကြာထိတွေ့မှုဖြစ်ပွားခဲ့သည်။

ရန်သူသည် ၎င်းတို့၏ နယ်မြေရှင်းလင်းရေးကိစ္စရပ်များအား စစ်တပ်နှင့်ရဲ ပူးပေါင်းဆောင်ရွက်နေစဉ်ကာလအတွင်း ရက္ခိုင့်တပ်တော်၊လှုပ်ရှားစစ်ကြောင်းများနှင့်နှစ်ဖက်ရင်ဆိုင်ထိတွေ့မှုဖြစ်၍ယခုကဲ့သို့တိုက်ပွဲဖြစ်ပွားရခြင်းဖြစ်သည်။

ရန်သူ(၁၀) ဦး နီးပါးအားရက္ခိုင့်တပ်တော်မှသုတ်သင်ရှင်းလင်းနိုင်ခဲ့သည်။

မိမိတို့ဖက်မှလည်း အလတ်စား၊ အပြင်းစား ဒဏ်ရာရသူအချို့ရှိခဲ့သည်။

သတင်းနှင့်ပြန်ကြားရေး

ရက္ခိုင့်တပ်တော်