ကိုရိုနာကူးစက်ရောဂါထိန်းချုပ်ရေးကာလအား အမြတ်ထုတ်ပြီး မြန်မာ့တပ်မတော်မှ ထိုးစစ်ဆင်တိုက်ခိုက်မှုကြောင့် မိမိတို့၏ဒဏ်ရာရလူနာများအား ဆေးကုသနေသော စခန်းငယ်တစ်ခု၊ ကာကင်းစခန်းငယ်တစ်ခုဆုံးရှုံးကာ အာရက္ခစစ်သည်တော်အချို့တိုင်းပြည်နှင့်လူမျိုးအတွက် အသက်စွန့်လွှတ်ခဲ့ရ

၂၀၂၀ ပြည့်နှစ်၊ မေလ(၂၅) ရက်

ရက္ခိုင့်တပ်တော်သည် ကိုရိုနာရောဂါအားကြိုတင်ကာကွယ်တားဆီးရေးနှင့် ထိန်းချုပ်ရေးလုပ်ငန်းများကိုအထောက်အကူပြုစေရန်အတွက် ကိုရိုနာရောဂါပိုးအား ကမ္ဘာ့ကပ်ရောဂါအဖြစ် မကြေညာခင်ကတည်းကပင် တစ်ဖက်သတ်အပစ်အခတ်ရပ်ဆိုင်းခြင်းကို ညီနောင်မဟာမိတ်အဖွဲ့များနှင့်အတူ ပူးတွဲထုတ်ပြန်ကြေညာခဲ့သည်။ ကြေညာထားသည့်အတိုင်း မိမိတို့ဖက်မှစတင်၍ ကြီးမားသောထိုးစစ်များကိုမပြုလုပ်သကဲ့သို့ တိုက်ပွဲများမဖြစ်ပွားစေရန် အတတ်နိုင်ဆုံးထိန်းသိမ်းခဲ့သည်။

မိမိတို့ဖက်မှထိုသို့ထိန်းသိမ်းနေသော်လည်း မြန်မာ့တပ်မတော်သည် မိမိတို့အားလေကြောင်း၊ လက်နက်ကြီး၊ သံချပ်ကာယာဉ်များမှ ပစ်ခတ်တိုက်ခိုက်မှုများကို မေလတစ်လလုံး၌ နေ့တိုင်းပစ်ခတ်တိုက်ခိုက်နေခဲ့သည်။ ပလက်ဝ၊ မြေပုံ၊ အမ်း၊ ရသေ့တောင်၊ ဘူးသီးတောင်၊ မြောက်ဦး၊ မင်းပြားမြို့နယ်များအတွင်း စစ်ဆင်ရေးအားအရှိန်အဟုန်မြှင့်ကာ ခပ်စိပ်စိပ်ပြုလုပ်နေခဲ့သည်။ စစ်အင်အား၊ လက်နက်အင်အား ဖြည့်တင်းခြင်းများကိုလည်း ဆက်တိုက်လုပ်ဆောင်နေခဲ့သည်။ ထို့ကြောင့် ရခိုင်၊ ပလက်ဝဒေသအတွင်း၌ နှစ်ဖက်ထိတွေ့မှုများမှာ နေ့တိုင်းနီးပါးရှိခဲ့သည်။

၂၀၂၀ ပြည့်နှစ်၊ မေလ (၂၄) ရက်၊ နေ့လယ် (၁၂) နာရီ ခန့်မှစတင်ပြီး မြန်မာ့တပ်မတော်၏ ဂျက်တိုက်လေယာဉ်(၂) စီးသည် ပလက်ဝမြို့နယ်၊ လောင်းကဒူးရွာအနောက်ဖက် (၂) ကီလိုမီတာအကွာအဝေးရှိ မိမိတို့၏ ဒဏ်ရာရလူနာများအားဆေးကုသနေသော စခန်းငယ်တစ်ခုအား လာရောက်ဗုံးကြဲတိုက်ခိုက်ခဲ့သည်။ ထို့အပြင် ပလက်ဝအခြေစိုက်၊ ခလရ(၂၈၉) နှင့် ခဝဲဗျူဟာတို့မှ လက်နက်ကြီးများ၊ ဟောင်ဝဇ္ဇာအမြောက်များဖြင့် (၃) နာရီနီးပါးတောက်လျောက်ပစ်ခတ်တိုက်ခိုက်ခဲ့သည်။ လက်နက်ကြီးပစ်ခတ်သည့်အကြိမ်အရေအတွက်(၃၀၀) ကျော်ရှိခဲ့သည်။ ထို့နောက်မြန်မာ့တပ်မတော်သည် အင်အားအလုံးအရင်းဖြင့်မိမိတို့၏ စခန်းငယ်အားမြေပြင်မှထိုးစစ်ဆင်တိုက်ခိုက်ခဲ့သည်။

မြန်မာ့တပ်မတော်၏ လေကြောင်း၊ လက်နက်ကြီးပစ်ကူ၊ မြေပြင်တပ်များ၏ ပူးပေါင်းထိုးစစ်ဆင်တိုက်ခိုက်မှုကြောင့် မိမိတို့၏ဒဏ်ရာရလူနာများကို ဆေးကုသနေသောစခန်းငယ်အား ခေတ္တစွန့်လွှတ်ခဲ့သည်။ ဒဏ်ရာရလူနာများထဲမှ အချို့မှာ မြန်မာ့တပ်မတော်၏ သတ်ဖြတ်မှုကြောင့် ကျဆုံးခဲ့ရသည်။

Covid-19 ကြိုတင်ကာကွယ်ရေး နှင့် ထိန်းချုပ်ရေးကာလအား မြန်မာ့တပ်မတော်အနေဖြင့် ဤကဲ့သို့အမြတ်ထုတ်ပြီး တိုက်ခိုက်ခဲ့သည့်အပြင် စစ်မြေပြင်၌ လိုက်နာကျင့်သုံးရမည့် နိုင်ငံတကာစစ်ဥပဒေများကိုချိုးဖောက်ပြီး ဆေးကုသနေသော ဒဏ်ရာရစစ်သည်လူနာများကို သတ်ဖြတ်ခဲ့သည်။

မေလ (၂၅) ရက်နေ့တွင်လည်း မြန်မာ့တပ်မတော်သည် နံနက် (၈) နာရီ (၃၀) မိနစ်မှစတင်ပြီး ပလက်ဝမြို့နယ်၊ လောင်းကဒူးရွာ အနောက်ဖက် (၁.၇) ကီလိုမီတာအကွာအဝေးရှိ မိမိတို့တပ်ဖွဲ့ဝင်များရှိရာသို့ လက်နက်ကြီးများကို ယမန်နေ့နည်းတူ စုပြုံပစ်ခတ်တိုက်ခိုက်ခဲ့သည်။ ညနေ (၆) နာရီခန့်တွင် မိမိတို့သည် အဆိုပါနေရာမှ ခေတ္တဆုတ်ခွာပေးခဲ့သည်။ ယခုနေရာသည် ယမန်နေ့ (မေလ၂၄-ရက်) မိမိတို့ ဆုတ်ပေးလိုက်ရသည့် ဒဏ်ရာရလူနာများအား ဆေးကုသနေသောနေရာနှင့် မီတာ (၃၀၀) ခန့်သာကွာဝေးသည်။

Covid-19 ထိန်းချုပ်ရေးကာလ၌ တိုက်ပွဲများကြောင့်ဖြစ်ပေါ်လာမည့် ကြီးမားသော ဆိုးကျိုးများ၊ နောက်ဆက်တွဲသက်ရောက်မှုများ မဖြစ်ပေါ်စေလိုသောစိတ်သဘောထားဖြင့် ယခုကဲ့သို့ နောက်ဆုတ်လိုက်ခြင်းဖြစ်သည်။

ဒဏ်ရာရလူနာများအားဆေးဝါးကုသနေသော မိမိတို့၏စခန်းနှင့်ကာကင်းစခန်းငယ်တစ်ခုတို့အား ခေတ္တစွန့်လွှတ်ခဲ့ရခြင်း၊ အာရက္ခစစ်သည်တော်များ အသက်ပေးဆပ်စွန့်လွှတ်ခဲ့ရခြင်းနှင့်ပတ်သက်၍ မိမိတို့ထုတ်ပြန်ထားသည့်အတိုင်း၊ ရပ်တည်ချက်အတိုင်း ထိုက်တန်သော လက်စားချေတုံ့ပြန်တိုက်ခိုက်မှုများကို ပြုလုပ်ဆောင်ရွက်သွားမည်ဖြစ်ကြောင်း အခိုင်အမာပြောကြားအပ်သည်။

သတင်းနှင့်ပြန်ကြားရေး

ရက္ခိုင့်တပ်တော်